برطانیہ کی ایک عدالت نے برطانوی فوجی لی رگبی کے قتل کے واقعے کے چند گھنٹوں بعد فیس بک پر مسلمانوں کو تشدد کی دھمکی دینے والے ستائیس سالہ باکسر کو الزام ثابت ہونے پر چار ماہ قید کی سزا سنائی ہے۔
جمعرات کو ڈیلی میل اخبار نے بتایا کہ پولیس نے جنوبی لندن میں ٹونی بیرن کو اپنے گھر کے قریب گرفتار کر لیا ہے جس نے فیس بک پر مسلمانوں کو دھمکیاں دیں اور اپنی ایک تصویر بھی شیئر کی جس میں اس نے نقاب پہنا ہوا تھا اور کیمرے کی طرف پستول کیا ہوا تھا۔
اخبار نے مزید بتایا کہ گزشتہ ماہ نائیجیریا نژاد دو مسلمان برطانویوں کے ہاتھوں لی رگبی نامی برطانوی فوجی کے قتل کے بعد مبینہ باکسر بیرن نے فیس بک پر لکھا: ❞اے مسلمانوں صرف تم اکیلے ہی بم بنانے اور متشدد جنونی کاروائیاں کرنے کے قابل نہیں ہو❝ اور ❞جو کچھ رگبی کے ساتھ ہوا میں اس سے بھی برا کروں گا، میرے پیچھے بہت سارے لوگ ہیں اور ہم بدلہ لیں گے❝
یاد رہے کہ گزشتہ ماہ مئی کی بائیس تاریخ کو برطانوی فوجی لی رگبی کی دو مسلمانوں کے ہاتھوں قتل کے بعد برطانیہ میں سخت ردِ عمل دیکھنے میں آیا ہے اور مسلمانوں کے خلاف پر تشدد واقعات میں اضافہ ہوا ہے اور 12 مساجد پر حملہ بھی کیا گیا ہے جبکہ سوشل میڈیا پر بھی مسلمانوں کو سخت تنقید کا نشانہ بنایا گیا ہے۔
